انا الصديق اللي ليا طحت شالك
أنــــــــا الـصـديق الـلــي ليا طحت شالك
لا ضامتك دنياك والوقت بك مال
أنا يمينك شدني في شمالك
يمنى بلا يسرى ترى حالها حال
أنا عزاك وعزوتك لا جرى لك
من تاعس الدنيا هواجيس وأهوال
ماني من اللي لا أغتنى ما وفالك
لو لك عليه من الجمايل والأفضال
وماني خويك كان وقتك صفا لك
أنا خويك لا أدبرت فيك الأحوال
خذني عصا موسى إذا الوقت هالك
أمسح لك بحور القهر قول وأفعال
فالك عسى الله يسعد اليوم فالك
فالك عقب الشهر عيد واقبال
وبالك يجي في خاطرك بيوم بالك
إنك تغيب ولاتجي لي عبى بال
لا لا تفكر أنت في مثل ذلك
إني أتخلى عنك لو الزمن طال
ما أقول أنا يا عم مالي وما لك
ما ترخص العشره ولا تغني أموال
اسمع جوابي قبل ما اسمع جوابك
خارج حدود الوطن وأرسل إرسال
على محيط السالفه حط بالك
أجيك رجلي كان ما جيت خيال
أنا ليا شح الزمن في وصالك
تمدني النخوه على وصلك حبال
أنا عمى عين العدو لانوى لك
أنول روحه قبل ما روحك تنال
بينك وبين الشمس شجرة ظلالك
ما للشجر قيمه إذا ماله ظلال
والليل لو الليل مظلم وحالك
ترسمني الظلماء على صدره هلال
منقووووووول
Wapher
del.icio.us